格桑拉姆 - 拉吉

词：拉加才让

曲：完玛

（未经许可,不得翻唱或使用）

དར་དཀར་པོ་ལྟ་བུའི་སྨུག་པ་དེ།།

རི་མཐོན་པོའི་ཟོམ་ནས་མཁའ་ལ་ཆས།།

གཡུ་སྔོན་མོ་ལྟ་བུའི་ནམ་མཁའ་ན།།

སྤྲིན་དཀར་པོ་དུམ་བུར་དུམ་བུར་བསྐྱོད།།

ཨེ་མ།

སྐལ་བཟང་ལྷ་མོ་ལགས།

མཐོངས་འདི་ན་བསྐྱོད་པའི་སྤྲིན་དཀར་འདི།

ཁྱོད་ཀྱི་གཡང་དཀར་ལུག་ཁྱུ་རེད།

དབྱར་མེ་ཏོག་བཞད་པའི་སྤང་ཐང་ན།།

རྩྭ་སྔོན་མོའི་མཛེས་སྡུག་ཐགས་སུ་བཀྲམ།།

རླུང་སེར་བུ་དལ་གྱིས་བརྒྱུད་པ་ན།།

སྤང་མེ་ཏོག་སེར་ཆེན་འཛུམ་ཞིང་དགོད།།

ཨེ་མ།

སྐལ་བཟང་ལྷ་མོ་ལགས།

སྤང་འདི་ན་བཞད་པའི་སེར་ཆེན་འདི།

ཁྱོད་ཀྱི་ལྷད་མེད་འཛུམ་མདངས་རེད།

གངས་དཀར་པོའི་སིལ་ནས་འོངས་པ་ཡི།།

ཆབ་སྔོན་མོ་འདི་ལ་དྭངས་ཤེལ་འཚེར།།

རྫ་སྨུག་པོའི་ཁྲོད་ནས་བཞུར་བ་ཡིས།།

ཡག་མུ་ཏིག་གཏོར་བཞིན་དགའ་ལྷང་ལྷང་།།

ཨེ་མ།

སྐལ་བཟང་ལྷ་མོ་ལགས།

ཆབ་སྔོན་མོ་ལྷུང་ལྷུང་བཞུར་སྒྲ་འདི།

ཁྱོད་ཀྱི་སྙན་འཇེབས་དགོད་སྒྲ་རེད།

སྐལ་བཟང་ལགས་ལྷ་མོ།